ಕಲಿಯುಗದ ಕರಾಳ ಮುಖ: ಅನುಕಂಪದ ಸರ್ಕಾರಿ ಕೆಲಸಕ್ಕೆ ಹೆತ್ತ ತಾಯಿಯನ್ನೇ ಕೊಲ್ಲಿಸಿದ ಪಾಪಿ ಮಗಳು; ಅಪಘಾತದ ನಾಟಕ ಬಯಲು ಮಾಡಿದ್ದು ಸಹೋದರನ ಸಣ್ಣ ಅನುಮಾನ!

​ಜೈಪುರ: ‘ಹೆತ್ತ ತಾಯಿಯೇ ದೇವರು’ ಎನ್ನುವ ಸಂಸ್ಕಾರದ ನಾಡಿನಲ್ಲಿ, ಸ್ವಾರ್ಥ ಮತ್ತು ದುರಾಸೆಗಾಗಿ ಹೆತ್ತ ತಾಯಿಯನ್ನೇ ಕೊಲೆ ಮಾಡಿದ ಘಟನೆಯೊಂದು ರಾಜಸ್ಥಾನದ ಜೈಪುರದಲ್ಲಿ ಬೆಳಕಿಗೆ ಬಂದಿದೆ. ಕೇವಲ ಅನುಕಂಪದ ಆಧಾರದ ಸರ್ಕಾರಿ ಕೆಲಸ ಮತ್ತು ಆಸ್ತಿಗಾಗಿ 23 ವರ್ಷದ ಯುವತಿ ತನ್ನ ತಾಯಿಯನ್ನೇ ಸುಪಾರಿ ಕೊಟ್ಟು ಕೊಲ್ಲಿಸಿ, ಅದನ್ನೊಂದು ರಸ್ತೆ ಅಪಘಾತ ಎಂದು ನಂಬಿಸಲು ಯತ್ನಿಸಿ ಸಿಕ್ಕಿಬಿದ್ದಿದ್ದಾಳೆ.

ಕೆಲವು ವರ್ಷಗಳ ಹಿಂದೆ ಜೈಪುರದ ಪ್ರತಾಪ್‌ ನಗರದ ನಿವಾಸಿ ವಿಜಯ್‌ ಕುಮಾರ್‌ ಶರ್ಮಾ ಎಂಬುವವರು ಮೃತಪಟ್ಟಿದ್ದರು. ಅವರ ಸಾವಿನ ಬಳಿಕ ಅವರ ಪತ್ನಿ ನೀರಜಾ ಶರ್ಮಾ (45) ಅವರಿಗೆ ಅನುಕಂಪದ ಆಧಾರದ ಮೇಲೆ ನ್ಯಾಯಾಲಯದಲ್ಲಿ ಕ್ಲರ್ಕ್‌ (ಗುಮಾಸ್ತ) ಕೆಲಸ ಸಿಕ್ಕಿತ್ತು. ಆದರೆ, ತಂದೆ ತೀರಿಕೊಂಡಾಗಲೇ ಆ ಕೆಲಸ ತನಗೆ ಬೇಕು ಎಂದು ಮಗಳು ಆಯುಷಿ ಪಟ್ಟು ಹಿಡಿದಿದ್ದಳು. ಮಗಳ ಆಸೆಗೆ ತಣ್ಣೀರೆರಚಿ ತಾಯಿ ನೀರಜಾ ಕೆಲಸಕ್ಕೆ ಸೇರಿಕೊಂಡಿದ್ದರು.

ಇದೇ ವಿಷಯಕ್ಕೆ ತಾಯಿಯ ಮೇಲೆ ತೀವ್ರ ಕೋಪಗೊಂಡಿದ್ದ ಆಯುಷಿ, ತಾಯಿಯನ್ನು ಮುಗಿಸಲು ಸ್ಕೆಚ್ ಹಾಕಿದ್ದಳು.ಜುಲೈ 3ರಂದು ರಸ್ತೆಯಲ್ಲಿ ನಡೆದು ಹೋಗುತ್ತಿದ್ದ ನೀರಜಾ ಶರ್ಮಾ ಅವರಿಗೆ ವೇಗವಾಗಿ ಬಂದ ಸ್ಕಾರ್ಪಿಯೊ ವಾಹನವೊಂದು ಗುದ್ದಿ ಸ್ಥಳದಲ್ಲೇ ಮೃತಪಟ್ಟಿದ್ದರು. ತಾಯಿ ಸತ್ತಾಗ ಮಗಳು ಆಯುಷಿ ಏನೂ ತಿಳಿಯದವಳಂತೆ ಮೊಸಳೆ ಕಣ್ಣೀರಿಟ್ಟಿದ್ದಳು.

ಎಲ್ಲರೂ ಇದನ್ನು ಸಾಮಾನ್ಯ ರಸ್ತೆ ಅಪಘಾತ ಎಂದೇ ನಂಬಿದ್ದರು. ಆದರೆ, ಮೃತ ನೀರಜಾ ಅವರ ಸಹೋದರ (ಆಯುಷಿಯ ಸೋದರಮಾವ) ರಾಕೇಶ್‌ ಅವರಿಗೆ ಈ ಸಾವಿನ ಬಗ್ಗೆ ತೀವ್ರ ಅನುಮಾನ ಮೂಡಿತ್ತು. ಅವರು ತಕ್ಷಣ ಪೊಲೀಸರಿಗೆ ದೂರು ನೀಡಿ, ತಮ್ಮ ಕೆಲವು ಸಂಬಂಧಿಕರ ಮೇಲೆ ಶಂಕೆ ವ್ಯಕ್ತಪಡಿಸಿದ್ದರು.

ರಾಕೇಶ್ ಅವರ ದೂರಿನ ಮೇರೆಗೆ ಡೆಪ್ಯುಟಿ ಕಮಿಷನರ್‌ ಆಫ್‌ ಪೊಲೀಸ್‌ ರಂಜಿತಾ ಶರ್ಮಾ ನೇತೃತ್ವದಲ್ಲಿ ತನಿಖೆ ಆರಂಭಿಸಿದ ಪೊಲೀಸರಿಗೆ ಶಾಕಿಂಗ್ ಸತ್ಯಗಳು ಲಭ್ಯವಾಗಿವೆ. ಇದು ಸಾಮಾನ್ಯ ಅಪಘಾತವಾಗಿರಲಿಲ್ಲ, ಬದಲಿಗೆ ಬಾಡಿಗೆ ಕೊಲೆಗಾರರನ್ನು (ಸುಪಾರಿ ಕಿಲ್ಲರ್ಸ್) ಬಳಸಿ ನಡೆಸಿದ ಪೂರ್ವ ಯೋಜಿತ ಕೊಲೆಯಾಗಿತ್ತು!

“ಸರ್ಕಾರಿ ಉದ್ಯೋಗ ಪಡೆಯಲು ಮತ್ತು ತಾಯಿ ಹೆಸರಿನಲ್ಲಿರುವ ಆಸ್ತಿಯನ್ನು ಕಬಳಿಸಲು ಮಗಳು ಆಯುಷಿ ತನ್ನ ಸ್ವಂತ ಮಾವಂದಿರ ಜೊತೆ ಸೇರಿ ಈ ಭೀಕರ ಸಂಚು ರೂಪಿಸಿದ್ದಳು. ಕೊಲೆಯನ್ನು ರಸ್ತೆ ಅಪಘಾತದಂತೆ ಬಿಂಬಿಸಿ ಪೊಲೀಸರ ಕಣ್ಣಿಗೆ ಮಣ್ಣೆರಚಲು ಯತ್ನಿಸಲಾಗಿತ್ತು.”

ಪ್ರಕರಣದ ತನಿಖೆ ಪೂರ್ಣಗೊಳಿಸಿರುವ ಜೈಪುರ ಪೊಲೀಸರು ಪ್ರಮುಖ ಸೂತ್ರಧಾರಿ ಆಯುಷಿ ಮತ್ತು ಆಕೆಗೆ ಈ ಕೃತ್ಯದಲ್ಲಿ ನೆರವಾಗಿದ್ದ ಆಕೆಯ ಮಾವ ಸೇರಿದಂತೆ ಒಟ್ಟು 6 ಮಂದಿ ಸಂಬಂಧಿಕರು ಹಾಗೂ ಬಾಡಿಗೆ ಕೊಲೆಗಾರರನ್ನು ಬಂಧಿಸಿ ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ. ಘಟನೆಯಲ್ಲಿ ಭಾಗಿಯಾಗಿ ತಲೆಮರೆಸಿಕೊಂಡಿರುವ ಉಳಿದ ಆರೋಪಿಗಳ ಪತ್ತೆಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ.

ಕೇವಲ ಒಂದು ಸರ್ಕಾರಿ ಕೆಲಸ ಮತ್ತು ಹಣದ ಆಸೆಗಾಗಿ ಜನ್ಮ ನೀಡಿದ ತಾಯಿಯನ್ನೇ ರಸ್ತೆಯಲ್ಲಿ ಕಾರು ಹತ್ತಿಸಿ ಕೊಂದ ಈ ಪಾಪಿ ಮಗಳ ವಿಕೃತ ಬುದ್ಧಿಗೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ.